"L'y est chouë, dz'ëro restà arrëto pe lo déser di Sahara. Quaque tsousa se s'ëre rontu dedin lo moteur de mon avion. Et di moman que dz'ayò avouë mè ni mecanichen, ni passadzë, dze m'apprestavo de tenté, solet, euna reapachon defecila. Lére pe mè euna quesstson de via o de mor. Dz'ayò dzeusto praou d'éve aprë p'euna vouètèina de dzor.

La premiëre nët dze me si donque indrumi dessu la sabla a pi de meulle vouet cent et cinquante dou kilométre d'un bocon de terra abitàye. Dz'ëro bien pi isolà d'un nofragà dessu euna plata-fourma i menten de l'ocean. Donque imaginade mina surprèisa, a la pouinte di dzor, quan euna drola de petsouda voéce m'at revèillà. I dijet:

-Pe plèisi... féi-mè lo dessin d'un maouton tseque!

..."