ERRONKA HANDIA Zortzi urte nituela gertatu zitzaidan oraintxe kontatuko dudana. Orduan ere Giacomo deitzen zidaten, noski, orain bezala, baina eskolan bakarrik: ?Riva Giacomo. ?Hementxe! Etxean, etxekoek, eta kalean, lagunek, Mino deitzen zidaten, besterik gabe. ?Mino, egin etxekolanak. ?Mino, ekarri esnea. ?Mino, ba al zatoz jolastera? Azken hori Riccardoren ahotsa da, nire lagun minarena. Riccardok mesede besterik ez zidan egiten, besteak beste, arreba nagusi bat zuelako, eta hark laguntzen ziolako zinemara, Luna Parkera, zoora. Erraza zen amak Riccardorekin joateko baimena ematea: arreba zentzudun-zentzuduna zuen, eta auzoko ama guztiak fio ziren hartaz. Carla zuen izena, eta txirikordatuta izaten zuen ilea, baina horrek berdin dio. Carla segituan desagertuko da gure kontakizunetik. Behin, Carlak zoora lagundu zigun, eta hantxe bota zidan Riccardok erronka: ?Ezetz ausartu gaua hemen pasatzera. Tigrearen kaiolaren parean geunden. Carla aurreraxeago joana zen. Hanka gainean lotan zegoen piztiari begiratu nion, eta sumindu egin nintzen Riccardoren susmoagatik. ?Ni? Baietz zu beldurtu. Txakurrekin ere beldurtzen zara eta. ?Nola? Zer esan duzu? Txakurren beldur naizela ni? Eta abar, eta abar. Ez naiz hasiko eztabaida osoa kontatzen, baina luzea eta bizi-bizia izan zen. Carlak oinez jarraitzeko esan zigunerako, hartua genuen erabakia. Zer ausartak ginen erakutsiko genion elkarri, zooan geratu eta gaua hantxe igarota, geuk bakarrik, tigreekin eta pantera beltzekin.Istorioen zooa honetan ere, Rodari gizakiaren miseriez eta itxaropenez mintzo zaie umeei, hizkera soil baina irmoan mintzo ere. Liburu honetan deskribatzen dituen alegiek agerian jartzen dute gure espezieak, sortu zenetik, berekin izan dituen itzalen sorta zabala: inbidia, iruzurra, indarkeria, jeloskortasuna Oraingoan, zoo bateko animaliak dira kontalariak, munduko zapalduen, iruzurra jasan dutenen eta errugabeen ordezkari. Hizkeraren eta harekin loturiko fantasia-jokoen berritzaile ukaezina izateaz gain, Rodari kontzientzien berritzaile ere bada, agerian jartzen baititu, bere luma zorrotzaz, bere obrak idatzi zituenez geroztik handitu baino egin ez diren arazoak: giza espezieak animaliekiko tratuan duen harrokeria --eta gutxiespen-- lotsagarria, espezieen desagertzea, ustelkeria politikoa Haren asmoa, behin eta berriro esan zuenez, ekitera bultzatzea izan baitzen, eta obra honetako ipuin batean ere adierazten du hori: ?Oker dauden gauzak zuzendu nahi badira, norbaitek hasi behar?. Eta Rodari hasi zen, hasi zenez! Walter Post Villacorta, irakaslea.