Pareko etxean argi bat ikusi du Mireiak, gau eta egun piztuta dagoen argi bat. Berak ez daki nor bizi den etxe horretan, ezta zergatik daukan argia piztuta ere: azterketak prestatzen dabilen ikasle bat? Oporretara joan eta argiak piztuta ahaztu zituen norbait? Hilda ote dago bertan bizi zena? Gaixo? Delituren bat egiten ari ote dira bertan? Irudimena bezain jakin-min handia du Mireiak, eta bere lagun Paulekin batera misterioa argitzen saiatuko da, benetako ikerlariak balira bezala.